मुख्यमंत्री लाडकी बहीण योजनेचा लाभघेणाऱ्या लाभार्थ्यांच्या घरोघरी जाऊन चारचाकी वाहनांची पाहणी केली जाणार आहे. लाभार्थी महिलेच्या कुटुंबात कोणाकडेही चारचाकी आढळून आली तर तत्काळ लाडकी बहीण योजनेतून नाव काढून टाकले जाणार आहे. अंगणवाडी सेविका आणि पर्यवेक्षिकांच्या माध्यमातून घरोघरी जाऊन पाहणी करण्याच्या सूचना महिला व बालविकास विभागाच्या वतीने देण्यात आल्या आहेत.
राज्याच्या महिला व बालविकास कल्याण विभागाचे सचिव अनुपकुमार यांनी सोमवारी राज्यातील सर्व जिल्हा महिला व बाल विकास कल्याण अधिकाऱ्यांशी व्हिडीओ कॉन्फरन्सिंग माध्यमातून बैठक घेतली होती. यावेळी त्यांनी या सूचना दिल्या.
असे आहेत नवे निकष.
लाडकी बहीण योजनेसाठी लाभार्थी महिलेचे वय १८ ते ६५ असावे.
कुटुंबाचे वार्षिक उत्पन्न अडीच लाखांच्या आत असावे.
कुटुंबातील कोणताही सदस्य सरकारी नोकरीत नसावा तसेच प्राप्तिकर भरणा नसावा.
संजय गांधी योजनेसारख्या दुसऱ्या योजनेचा लाभ घेतलेला नसावा.
चारचाकी वाहने असणाऱ्या महिला योजनेच्या लाभार्थी नसाव्यात.
या निकषांमध्ये न बसणाऱ्या लाडक्या बहिणींना स्वतःहून लाभातून माघार घेण्याचे आवाहन करण्यात आले होते. मात्र, यानंतरही लाभार्थी महिलांच्या वतीने माघार घेण्यात येत नसल्याचे शासनाच्या निदर्शनास आल्यास अशा लाडक्या बहिणींवर प्रशासनाकडून कठोर पावले उचलण्यात येणार असल्याचे अधिकाऱ्यांनी सांगितले.
