कोल्हापूर / प्रतिनिधी
शिवाजी विद्यापीठातील विविध अधिविभागांमधील विद्यार्थ्यांच्या क्रीडागुणांना वाव देण्यासाठी शिवस्पंदन वार्षिक क्रीडा महोत्सवाचे आयोजन केले जात आहे. खेळाडूंना राज्य, राष्ट्रीय व आंतरराष्ट्रीय पातळीवर प्रतिनिधीत्व करण्याची मोठी संधी उपलब्ध झाली आहे, असे प्रतिपादन कुलगुरू डॉ. डी. टी. शिर्के यांनी केले.
शिवाजी विद्यापीठाच्या क्रीडा व शारीरिक शिक्षण अधिविभागामार्फत आयोजित शिवस्पंदन वार्षिक क्रीडा महोत्सव २०२४-२५ च्या उद्घाटनप्रसंगी ते बोलत होते. याप्रसंगी प्र-कुलगुरू डॉ. पी. एस. पाटील यांची प्रमुख उपस्थिती होती. क्रीडापटूंचे उत्कृष्ट संचलन, विविध क्रीडा प्रकारांच्या प्रात्यक्षिकांचे सादरीकरण व ज्योत प्रज्वलन उपक्रमांनी सोमवारी सायंकाळी शिवाजी विद्यापीठाच्या तिसऱ्या शिवस्पंदन क्रीडा महोत्सवाचे उद्घाटन झाले. कुलगुरू डॉ. शिर्के व प्र-कुलगुरू डॉ. पाटील यांनी ध्वजवंदन केले. त्यानंतर विद्यापीठाच्या विविध ३० अधिविभागांतील २,३०० क्रीडापटूंनी उत्कृष्ट संचलन केले.
याप्रसंगी विद्यापीठाची शिवछत्रपती क्रीडा पुरस्कार प्राप्त आंतरराष्ट्रीय सॉफ्टबॉल खेळाडू स्वप्नाली वायदंडे हिच्या हस्ते उद्घाटनस्थळी क्रीडा ज्योतीचे आगमन झाले. मान्यवरांच्या हस्ते शिवस्पंदन स्पर्धेची ज्योत प्रज्वलित करण्यात आली.
यावेळी क्रीडापटूंनी जिम्नॅशियम, योगा, मल्लखांब, धनुर्विद्या, घोडेस्वारी क्रीडा प्रकारांची प्रात्यक्षिके सादर केली. त्यानंतर आकाशात फुगे सोडून औपचारिक उद्घाटन झाल्याचे घोषित करण्यात आले. स्वप्नाली वायदंडे हिने सहभागी खेळाडूंना शपथ दिली. क्रीडा संचालक डॉ. शरद बनसोडे यांनी प्रास्ताविक केले. डॉ. एन. डी. पाटील यांनी सूत्रसंचालन केले. डॉ. किरण पाटील यांनी आभार मानले.
यावेळी अधिष्ठाता डॉ. श्रीकृष्ण महाजन, डॉ. महादेव देशमुख, परीक्षा व मूल्यमापन मंडळाचे संचालक डॉ. अजितसिंह जाधव, डॉ. सागर डेळेकर, डॉ. रामचंद्र पवार, डॉ. तानाजी चौगुले, डॉ. तृप्ती करेकट्टी, डॉ. राजेंद्र सोनकवडे आदी उपस्थित होते.
