हातकणंगले /प्रतिनिधी
हातकणंगले विधानसभा मतदार संघातील शिवसैनिक उद्धव बाळासाहेब ठाकरे शिवसेना पक्षावर प्रेम करणारा आहे . तो अन्य कोणत्याही पक्षात जाणार नाही . ठाकरे शिवसेनेचे शिवसैनिक निष्ठावंत आहेत . ते पक्षाशी व ठाकरे घराण्याची एकनिष्ठ राहतील यात तीळ मात्र शंका नाही . असा विश्वास उद्धव बाळासाहेब ठाकरे शिवसेना पक्षाचे जिल्हाप्रमुख संजय चौगुले यांनी व्यक्त केला . हातकणंगले येथे आयोजित पत्रकार परिषदेत बोलत ते होते . यावेळी माजी जि . प . सदस्य महेश चव्हाण , माजी प .स . सदस्य पिंटू मुरूमकर , गणेश भांबे , शरद पवार यांच्यासह शिवसेनेचे पदाधिकारी उपस्थित होते .
जिल्हाप्रमुख संजय चौगुले यांनी सांगितले , हातकणंगले विधानसभा मतदारसंघातील उद्धव बाळासाहेब ठाकरे गटाचे शिवसैनिक व पदाधिकारी हे माजी आमदारांसोबत शिवसेना शिंदे गटात जाणार असल्याची चर्चा असली तरीही ठाकरे शिवसेनेचे शिवसैनिक पक्षाशी एकनिष्ठ राहून ठाकरे गट अभेद्य ठेवतील . भावी काळात ठाकरे शिवसेना रस्त्यावरची लढाई लढत राहील . सर्वसामान्यांचे प्रश्न सोडवण्यात सक्रिय राहील . नागरिकांना न्याय मिळवून देण्याची भूमिका असेल . कोल्हापूर जिल्ह्यात अनेकदा राजकीय घडामोडी घडल्या परंतु मातोश्रीवरून आलेले सर्व आदेश मानून जिल्ह्यातील शिवसैनिका काम करत राहिला आहे . इथून पुढे तसेच काम करत राहील . शिवसेनेत कोण आले कोण गेले यापेक्षा शिवसेना वाढीसाठी प्रयत्नशील राहणार असल्याचे जिल्हाप्रमुख चौगुले यांनी सांगितले .
यावेळी माजी जि . प . सदस्य महेश चव्हाण यांनी सांगितले शिवसैनिक आदेशावर चालणारा असून मातोश्रीवरून जो काही आदेश येईल त्याचे तंतोतंत पालन करणार आहे . तसेच शिवसेना उद्धव बाळासाहेब ठाकरे पक्ष हातकणंगले तालुक्यामध्ये ताकतीने काम करत राहील.
पत्रकार परिषदेस हातकणंगले तालुका उद्धव बाळासाहेब ठाकरे शिवसेना पक्षाचे सर्व पदाधिकारी उपस्थित राहणार असे सांगण्यात आले होते. मात्र पक्षाचे काही पदाधिकारी अनुपस्थित राहिल्याने नेमके ते कोणाच्या संपर्कात असतील याबाबत चर्चा बैठकीत रंगली होती .