कोल्हापूरने पुरुषांत, तर मुंबई उपनगर पश्चिमने महिलांत 72 व्या वरिष्ठ गट पुरुष व महिला राज्य अजिंक्यपद निवड चाचणी कबड्डी स्पर्धेत विजेतेपद पटकावले. महाराष्ट्र राज्य कबड्डी असो. च्या मान्यतेने ठाणे जिल्हा कबड्डी असो.ने विश्वास सामाजिक संस्था व शारदा संकल्प प्रतिष्ठान यांच्या सहकार्याने या स्पर्धेचे आयोजन केले होते. ठाणे पश्चिम येथील भारतरत्न माजी पंतप्रधान स्व. अटल बिहारी वाजपेयी क्रीडांगणार झालेल्या पुरुषांच्या अंतिम सामन्यात कोल्हापूरने अहमदनगरचा 42-32 असा पराभव करीत दोन तपांच्या कालावधीनंतर श्रीकृष्ण करंडक फिरत्या चषकाबरोबर मुख्यमंत्री चषकावर आपले नाव कोरले.
अंतिम सामन्यात कोल्हापूरने सावध सुरुवात करीत नगरवर पहिला लोण देत विश्रांतीला 18-13 अशी आघाडी घेतली. कोल्हापूरने विश्रांतीनंतर आपला खेळ अधिक गतिमान केला. त्यांच्या सौरभ फगरे याने एकाच चढाईत 3 गडी टिपत व शिलकी गड्याची पकड करीत दुसरा लोण देत 26-16 अशी आपली आघाडी वाढविली. पुन्हा त्यांच्या साहिल पाटीलने एकाच चढाईत 4 गडी टिपत तिसरा लोण देत आपली आघाडी 38-24 अशी भक्कम केली. शेवटची पाच मिनिटे पुकारली तेव्हा 40-27 अशी कोल्हापूरकडे आघाडी होती. शेवटी 10 गुणांच्या फरकाने कोल्हापूरने आपल्या दुसर्या जेतेपदावर शिक्कामोर्तब केले.
कोल्हापूरच्या विजयात सौरभ व साहिलला चढाईत ओंकार पाटील, तर पकडीत दादासो पुजारी व अविनाश चरापलेची भक्कम साथ लाभली. कोल्हापूरचा संपूर्ण स्पर्धेत बचाव भक्कम झाला. नगरच्या आदित्य शिंदे, सौरभ राऊत यांनी चढाईत एकूण 13 बोनस गुण घेतले; पण त्यांचा बचाव अगदीच सुमार दर्जाचा झाला.
महिलांच्या अंतिम सामन्यात मुंबई उपनगर पश्चिमने 5-5 चढायांत मुंबई शहर पश्चिमचा प्रतिकार 33-32 (6-5) असा मोडून काढत पार्वतीबाई सांडव फिरता चषक व मुख्यमंत्री चषक आपल्याकडे खेचून आणला. हा सामना 27-27 असा बरोबरीत संपला. सामन्याच्या निकालाकरिता दोन्ही संघांना प्रत्येकी 5-5 चढाया देण्यात आल्या. त्यात उपनगरने चढाईत 5 गुण व पूजा यादवची पकड करीत 6 गुण घेत बाजी मारली. पूजाची पकड मुंबई शहराला पराभवाच्या खाईत घेऊन गेली.
