इचलकरंजी/ प्रतिनिधी
दक्षिण भारत जैन सभेच्या येथील दिगंबर जैन बोर्डिंगच्या आवारातील श्री १००८ चंद्रप्रभू तीर्थंकर जिन मंदिरात १६ ते २२ एप्रिल दरम्यान पंचकल्याण प्रतिष्ठा महामहोत्सव व विश्वशांती महायज्ञ आयोजिला आहे. या कालावधीत विविध धार्मिक व सांस्कृतिक कार्यक्रम होणार असल्याची माहिती महोत्सव समितीचे अध्यक्ष रवींद्र पाटील व उपाध्यक्ष सुभाष बलवान यांनी पत्रकार बैठकीत दिली.
येथील दिगंबर जैन बोर्डिंगच्या आवारात १९९९ मध्ये श्री १००८ चंद्रप्रभू मंदिराची उभारणी होऊन या मंदिराचा पंचकल्याण प्रतिष्ठा महोत्सव आचार्य रत्न बाहुबली मुनी महाराज यांच्या सानिध्यात झाला. या महोत्सवाला २५ वर्ष पूर्ण झाल्याबद्दल जिन मंदिरातील गर्भग्रहांमध्ये श्वेतवर्णी नयन मनोहर चंद्रप्रभू तीर्थंकर पद्मासनस्थ नूतन प्रतिमा विराजमान करून त्याची पंचकल्याण पूर्वक प्राणप्रतिष्ठा पूजा महोत्सव करण्याचा निश्चय केला असून आचार्यत्न बाहुबली मुनी महाराज यांचे परमशिष्य आचार्य १०८ श्री जिनसेन मुनी महाराज व क्षुल्लकरत्न परमपूज्य श्री १०५ समर्पण सागर महाराज यांच्या पावन सानिध्यात जगद्गुरू स्वस्तिश्री जिनसेन भट्टारक पट्टाचार्य महास्वामी (नांदणी) यांच्या आज्ञेवरून जगद्गुरु स्वास्थ्य श्री लक्ष्मीसेन भट्टारक भट्टाचार्य महास्वामी (कोल्हापूर) यांच्या पावन उपस्थितीत महोत्सव प्रतिष्ठाचार्य पंडित डॉ. सम्मेद उपाध्ये (साजणी) यांच्या मार्गदर्शनाखाली सोहळा होणार आहे. १६ एप्रिलला ध्वजारोहण व गर्भ कल्याणीक पूर्वार्ध विधी, १७ रोजी नवग्रह होम व गर्भ कल्याण उत्तरार्ध विधी, १८रोजी जन्म कल्याणिक आणि
पांडूक शिलेवर जन्माभिषेक सोहळा, १९ रोजी राज्याभिषेक व दीक्षा कल्याणिक सोहळा, २० रोजी मौजीबंधन, अलंकार पूजा व कुमकुम विधी, २१ रोजी केवलज्ञान कल्याणिक महोत्सव व रथोत्सव सोहळा तर २२ रोजी मोक्ष कल्याण आणि महाकलशाभिषेक कार्यक्रम होणार आहे. महोत्सव काळात विविध वक्त्यांची भाषणे आणि प्रवचन त्याचबरोबर सांस्कृतिक कार्यक्रम व मिरवणुकीचे आयोजन करण्यात आले आहे. धार्मिक, सामाजिक, शैक्षणिक, क्रिडा, संस्कृतिक राजकीय अशा विविध क्षेत्रात उल्लेखनीय योगदान देणारे माजी खासदार कल्लाप्पाण्णा आवाडे यांचा सकल जैन समाजातर्फे ‘संस्कार रत्न’ या पदवीने सन्मान करण्यात येणार आहे. हा सोहळा २० एप्रिल रोजी दुपारी विविध मान्यवरांच्या उपस्थितीत होणार आहे. पत्रकार बैठकीला महोत्सव समितीचे सेक्रेटरी बाबासो हुपरे, नरेंद्र केटकाळे, पाश्वनाथ पाटील यांच्यासह समिती सदस्य दिगंबर जैन बोर्डिंग, वीर सेवा दल आणि वीर महिला मंडळाचे पदाधिकारी उपस्थित होते.
