पंढरपूर / प्रतिनिधी
चैत्र यात्रा झाल्यानंतर मंदिर समिती पुरातत्त्व विभागाचे अधिकारी, मंदिर समितीच्या अधिकाऱ्यांबरोबर पाहणी करून, चर्चा करून विठ्ठलमूर्तीवर रासायनिक लेपन प्रक्रिया (एपोक्सी) करण्याचा निर्णय घेण्यात येणार असल्याची माहिती मंदिर समितीचे सहअध्यक्ष गहिनीनाथ महाराज औसेकर यांनी दिली.
श्री विठ्ठल-रुक्मिणी मंदिर समितीची मंगळवारी बैठक झाली. या बैठकीदरम्यान पुरातत्त्व विभागाच्या वतीने श्री विठ्ठलाच्या मूर्तीची झीज झाल्याचे पत्र (अहवाल) मंदिर समितीला दिले. पदस्पर्श दर्शनामुळे विठ्ठलाच्या चरणाची झीज होत आहे. देवाचा अभिषेक होत असल्यानेही मूर्तीची झीज होत असल्याचे पुरातत्त्व विभागाने स्पष्ट केले आहे. त्यामुळे विठ्ठलमूर्तीला पुन्हा एकदा रासायनिक लेपन (एपोक्सी) प्रक्रिया येणार आहे. करण्यात दरम्यान, श्री विठ्ठलाच्या चरणाची झीज झाल्याने त्यावर रासायनिक लेपन करण्यासाठी मंदिर बंद ठेवावे लागणार आहे. तसेच, श्री विठ्ठल व रुक्मिणीमातेच्या गर्भगृहाचे काम ७० टक्के पूर्ण झाले आहे. उर्वरित ३० टक्के काम ५ जूनपर्यंत पूर्ण करण्यात येणार आहे. श्री विठ्ठल-रुक्मिणी मंदिराचे जतन व संवर्धनाचे काम सुरू आहे. यातच मंगळवारी पुरातत्त्व विभागाने श्री विठ्ठलाच्या मूर्तीची झीज झाली असल्याचे पत्र मंदिर समितीला दिले आहे. त्यानंतर बैठक झाली.
