कोल्हापूर / प्रतिनिधी
शिवाजी विद्यापीठाच्या वाटचालीत महिला शिक्षकांसह प्रशासकीय सेविकांनी दिलेले योगदान महत्त्वाचे आहे. विद्यापीठामधील महिला उच्च नितीमूल्यांनिशी कार्यरत असून सर्व घटकांना न्याय प्रदान करण्यातही त्या आघाडीवर आहेत, असे प्रतिपादन विद्यापीठाचे कुलगुरू डॉ. दिगंबर शिर्के यांनी आज येथे केले.
आंतरराष्ट्रीय महिला दिनानिमित्त स्त्री अभ्यास केंद्र, बेटी बचाओ अभियान, विद्यापीठ अंतर्गत तक्रार समिती, महिला वसतिगृह, विद्यार्थी विकास विभाग यांच्या संयुक्त विद्यमाने ‘महिलांचे उच्च शिक्षणातील शैक्षणिक आणि प्रशासकीय योगदान’ या विषयावर एकदिवसीय कार्यशाळेत अध्यक्षस्थानावरून ते बोलत होते.
डॉ. शिर्के म्हणाले, मुलींच्या शिक्षणाच्या बाबतीत समाजाची दृष्टी वेगाने बदलत आहे. त्यांच्या शिक्षणास मदत करण्याकरिता अनेक घटक पुढे येत आहेत. परिणामी विद्यापीठात नवीन विद्यार्थिनी वसतिगृह आणि अभ्यासिका निर्माण झाली. विविध प्रकारच्या जबाबदाऱ्यांचे ओझे आणि सामोऱ्या येणाऱ्या अनंत अडचणींना तोंड देत महिला अग्रक्रमाने पुढे जात आहेत, याचा अभिमान वाटतो.
कुलसचिव डॉ. विलास शिंदे यांनी महात्मा फुले यांनी महिलांच्या शिक्षणामध्ये मोठे योगदान दिले. भारतामध्ये स्त्रियांना समाजाच्या मुख्य प्रवाहामध्ये आणण्यासाठी अनेक प्रयत्न झाले असे सांगितले. अधिष्ठाता डॉ. मेघा गुळवणी म्हणाल्या, घर जबाबदारीने सांभाळणाऱ्या स्त्रियांनाही माणूस म्हणून बरोबरीचा अधिकार आणि सन्मान मिळणे आवश्यक आहे. यावेळी वित्त व लेखाधिकारी डॉ. सुहासिनी पाटील, डॉ. भारती पाटील यांनीही मार्गदर्शन केले. स्त्री अभ्यास केंद्राच्या संचालक डॉ. निशा मुडे- पवार यांनी स्वागत केले. डॉ. प्रतिभा देसाई यांनी आभार मानले. प्राजक्ता शहा यांनी सूत्रसंचलन केले. महिला वसतिगृहाच्या मुख्य अधीक्षक डॉ. माधुरी वाळवेकर, समाजशास्त्र अधिविभागप्रमुख डॉ. प्रतिमा पवार, डॉ. ज्योती जाधव, यांच्यासह शिक्षिका व कर्मचारी उपस्थित होते.
