इचलकरंजी/ प्रतिनिधी
केंद्र शासन पुरस्कृत पीएम बस चार्जिंग सेवा योजना अंतर्गत इचलकरंजी महानगरपालिका परिवहन व्यवस्थेसाठी महानगरपालिकेस २५ इ-बसेस आणि त्यासाठी पायाभूत सुविधांसाठी ९.८९ कोटी रुपये निधी मंजूर झाला आहे. पीएम इ बससाठी महानगरपालिका मालकीची आरक्षित जागा उपलब्ध करून देण्यात आलेली आहे.
त्याठिकाणी चार्जिंग स्टेशन आणि इ बस डेपो इमारतीचे बांधकाम सुरू आहे. या कामाची आयुक्त पल्लवी पाटील यांनी शहापूर येथे जागेस भेट देऊन पाहणी केली.
केंद्र सरकारच्या पीएम बस चार्जिंग सेवा अंतर्गत असलेले काम गुणवत्तापुर्वक आणि मुदतीत पूर्ण करण्याच्या सुचना यावेळी आयुक्त पाटील यांनी संबंधित विभाग प्रमुख यांना दिल्या. यावेळी प्र. नगर अभियंता (विद्युत) अभय शिरोलीकर, शाखा अभियंता बाजी कांबळे, प्र. विद्युत अभियंता इसरार बेग आदी उपस्थित होते.
