मिरज/ प्रतिनिधी
मिरज तालुक्यातील बेडग येथील एका आश्रम शाळेतील १८ विद्यार्थ्यांना कावीळची लागण झाल्याचे समोर आले आहे. या घटनेने मिरज तालुक्यात खळबळ उडाली आहे. कावीळची लागण झालेल्या विद्यार्थ्यांना रुग्णालयात उपचारासाठी दाखल करण्यात आल आहे.
बेडग येथे असलेल्या एका आश्रम शाळेत इयत्ता पहिली ते दहावीपर्यंतच्या वर्गामध्ये सुमारे ४८० विद्यार्थी शिक्षण घेत आहेत. यापैकी काही विद्यार्थ्यांना दि. १४ फेब्रुवारी रोजी कावीळ सदृश्य उलटी, जुलाब, ताप येणे अशी लक्षणे दिसू लागली. दि. २७ फेब्रुवारी रोजी येथील काही विद्यार्थ्यांचा त्रास वाढल्याने त्यांना उपचारासाठी खाजगी रुग्णालयात दाखल केले होते. रुग्णालयात तपासणी केली असता १८ विद्यार्थ्यांना कावीळची लागण झाल्याचे स्पष्ट झाले आहे. त्यापैकी ६ विद्यार्थ्यांना मिरज शासकीय रुग्णालय व अन्य विद्यार्थी खाजगी रुग्णालयात उपचार घेत आहेत. तर शाळेतील ४ विद्यार्थ्यांना उपचारानंतर घरी सोडण्यात आल्याची माहिती मिळाली.
