कोल्हापूर/ प्रतिनिधी
महापालिकेच्या आरोग्य विभागाच्या वतीने शहरात एकल वापर प्लास्टिक बंदी मोहिमेची प्रभावी अंमलबजावणी करण्यात येत आहे. मंगळवारी महापालिकेच्या आरोग्य विभागाच्या वतीने प्रशासक के. मंजूलक्ष्मी व अतिरिक्त आयुक्त राहुल रोकडे यांच्या मार्गदर्शनाखाली तावडे हॉटेल लाईन, शाहू टोल नाका, राजारामपुरी परिसरात एकल वापर प्लास्टिकची तपासणी करण्यात आली. यावेळी शाहू टोल नाका येथील विशाल ट्रेडर्स, जयवंत स्वीटस्, राजारामपुरी येथील शर्मा स्वीटस्, अय्यंगार बेकरी, पुरोहित बेकरी, जसवंत स्वीटस् व तावडे हॉटेल येथील शाम सुखवानी शॉप अशा सात व्यापाऱ्यांकडे तपासणीदरम्यान प्लास्टिकचा साठा आढळून आला. त्यामुळे आरोग्य विभागाच्या पथकाने पाच व्यापाऱ्यांना प्रत्येकी ५ हजार रुपये, तर तावडे हॉटेल येथील शाम सुखवानी शॉप व शाहू टोल नाका येथील जसवंत स्वीटस् यांना प्रत्येकी रु. १० हजार असे एकूण ४५ हजार रुपये दंड करून तो वसूल करण्यात आला. ही कारवाई सहायक आयुक्त स्वाती दुधाने, विभागीय आरोग्य निरीक्षक ऋषीकेश सरनाईक, नंदकुमार पाटील, आरोग्य निरीक्षक भूमी कदम, सुशांत कावडे, मुनीर फरास, मनोज लोट व कर्मचाऱ्यांनी केली.
